Diskubri Talentus

Delegason di Ministeriu di Edução i Disportu di Tarrafal (DSMEDT) atraves di ses Gabinetiu di Apoiu i Akonpanhamentu Psikologiku (GAAP) realiya na Sentru di Idukason Delta Kultura (SEDK) un serie di ativadadis dentru di ses prugrama kes da nomi di “Diskubri Talentus”

Atividadis komesa ku diskursu di delegadu di Ministeriu di Idukason i Disportu (MID), sinhor Jose dos Reis Lopes, ki dipos di fazi un brevi apanhadu sobri diferentis Nicissidadis Idukativas Ispisiais (NII) ki ta afeta kriansas/jovens i non so, mas tanbe pa parti di sel fika klaru ki trabadja ku portadoris di NII e bastanti difisil, mas si nu apruveta di kes 2 feramentas inportanti ke sensibilidadi i didikason tudu ta torna fasil.

Kel sala e un sala ku tudu ekipamentus di ki un portador di NII ta nicissita pa torna si manera di vivi mas fasil, nton assi tudu mai dja sta di gossi kunvidadu a leba si fidju la na kel lugar sin ki kel sala abri dja na inisiu di novu anu skolar 2013/14.

Inda duranti atividadi ki na kada pauza ta ser animadu pa Batukaderas Delta Kultura i kes kriansas/jovens ku NII, psikoluga Janete Fortes fazi si intervenson pa fala un bokadinhu sobri inkluzon di pissoas ku NII na dipsortu, mas tanbe kel enkontru doi markadu pa assinatura di luvru di kunprumissu.

Livru di kumprumissu e un dukumentu undi ki tudu mai ou pai, inkaregadu id idukason ta bai poi mo na tinta i dipos ta ben dexa si inprison na kel livru. Dipos di kela, dibaxu di kada inpreson ta ben ser skritu ses nomi pa sabedu kenha ki sta assumiba kunprumissi di ama, kuida, rispeta i fazi tudu kuza pa si fidju indipendentimenti di el e ten NII.

Mas atividadi ka finda pa li, dipos di sina kel livru di compromissu, passadu pa konkursu di pintura, undi ki kada partisipanti ku si lapis, pinsel i otus matirial ta bai dizenhaba un dizenhi di si gostu i di si autoria, i foi un atividadi sensasional sima nhos ta passa ta ben konfiri nalguns fotus dibaxu.

Dipos di pintura, kes partisipantis podi tanbe mostra a tudu alguen ki staba prizenti, ki es e kapaz di pratika disportu tanbe, atravez di un korida di kadera di roda rializadu, mas tanbe atravez di otus pratika disportiva ki nu podi prizensia na kampu di futibol.

Pa termina kel dia spesial ku kes kriansas/jovens li passadu pa aprizentason di dizenhus di kada kriansa/joven, ki na kada bes ki mostradu dizenhu i fladu nomi di ken ki fazi alegria era txeu na rostu di kada un des.

Pa finaliza mesmu, fika konviti di forma un assosiason pa difeza di interessi di kes portadoris di NII, ki foi lansadu pa Kumite parolinpiku di cabo Verde (KPCV) undi ki tudu prizentis asseta ku maior naturalidadi.

Nton nu ben konfiri kes fotus di tudu kes atividadis ki foi realizadu.

Leave a Reply

Your email address will not be published. Required fields are marked *

*
*
Website