Inaugurason di Sentru di Futibol Pa Speransa di Tarrafal (SFPST)

Na ta finda, Delta Kultura Kabu Verdi (DKKV) silisionadu pa FIFA komu un di kes 20 organizason di Áfrika pa resebi un sentru di futibol pa speransa. pf_2

Na dia 22 di Junhu di 2013, SFPST abri porta pa tudu alguén di Tarrafal. Kel prujetu é dizenhadu pa ten un kampu relvadu ku mididas di 40×20 (sima un polivalenti) i un kaza ku 157 metru kuadradu ki ta ben ten un sala multiuzu, i un blioteka/sala di informátika. Enbora fika uns kuzinha di obras pa kel kaza tirmina festa staba sábi.

Tcheus kunvidadus nasional i iternasional staba na sirimónia, sima, Ministra di Idukason i Disportu Sra. Fernanda Marques, Delegadu di FIFA pa Áfrika Osidental, Sr. Sampon Kablan, ko-fundador di streetfootballworld Dr. Vladimir Borkovic, Prizidenti di Kânbra Munisipal di Tarrafal Sr. José Pedro Nunes Soares , Priszidenti di Fiderason Kabuverdiana di Futibol Sr. Mário Semedo ki fazi parti di meza di diskursu, djuntu ku gerenti di SFPST Sr. Florian Wegenstein, i inda otus konvidadus xpisial.

Sirimónia foi sistidu pa tcheus alguén di Tarrafal na sentru, i inda pa un munti di kabuverdianus na mundu interu i non só, atravéz di Tilivizon di Kabu Verdi, ki staba na sirimónia pa fazi riportagen, ki konta ku tcheus atividadis kultural ki konta ku partisipason di un munti kriansas di sentru.

Dipós di korti di fita, pasadu pa kel tradisional almusu ku kunvidadus i alguns otus alguén.

Di kel forma li, DKKV ta apruveta pa agradesi tudu si parserus involvidu na es prujetu li, sobritudu, FIFA, streetfootballworld, Arkitetura Pa Humanidadi, Green Fields i Yingli Solar, tanbé DKKV ta apruveta oportunidadi pa informa ma kel sentru li é di tudu tarafalensis i non só.

Pa fin fika kel promesa di fazi di tudu na uzu di kel prujetu li, pa leba Tarrafal kada bes más pa riba.

2 thoughts on “Inaugurason di Sentru di Futibol Pa Speransa di Tarrafal (SFPST)

  1. Parabems Delta Kultura!
    nos e kontenti ke sentru ta gressi e kampu sta “basof”!(M ka sabi modi ta skrebi …)
    Nhos fika fixe i kumprimento i abrazo pa tudo na Tarrafal.
    Tempo sta mau na alimanha, i nos tem tcheu sodadi!

    Deus ku nhos,

    Frank, Uli ku Béla

Leave a Reply

Your email address will not be published. Required fields are marked *

*
*
Website