Konsulta Médika

Pa sigundu bes, kontisi na Sentru di Idukason Delta Kultura (SIDK), konsultas médika ku kriansas ki ta frikuenta sentru.

Kes consultas médika, sima difinidu pa SIDK ten ki kontisi dos(2) bes pa més, y ku txeu regularidadi, pa podi dadu midjor asistensia médiko a kes kriansas, sempri ki kontisi kualker kuza di anormal.

Nes sigundu konsulta, atxadu txeu prublemas sima Mikosi, Tossi Seku, Dor Abdominal ka agudu, Disenvolvimentu intelectual lentu, petu fitxadu e otus, na un total di des(10) kriansas di sexu femininu, ku idadis entri 7 y 13 anus di idadi. Mas konformi kes observason mediko, kes problemas foi tudu inkaminhadu pa realizason di alguns izamis médikus.

Mas na verdadi, es konsultas ten stadu ta kontisi mas poku du ki speradu, y ku txeu dimora, y kela ta afeta diretamenti kes kriansas, ki é nos preokupason, sima nu ta observa.

Kes konsultas, mesmu ki poku, é garantidu pa dotoris di Hospital di Tarrafal, des bes fetu pa Dr. Augusto, ki komprometi na fazi keli voluntariamenti y sen kobra, pamodi orsamentu di SIDK na momentu ka ta da pa kubri ku es prugrama, mas nu ta konta sempri ku pisoas, instituisons, organizasons ki ta trabadja ku kriansas pa promovi ses saúdi. Pur isu, nu kre trabadja djuntu pa kolabora pa ben star di tudu kriansas di Tarrafal.

Ainda paralém di konsulta médika pa kriansas, fazedu un pikenu seson di sklaresimentus ku pais y inkaregadus di idukason di kes kriansas, y des bes es pôdi kumpanha ses fidju na konsulta y es podi sabi també alguns kuidadus medikus y manobras di ason ki podi ser uzadu na kazus di imergensia.

Pa finaliza, nu ta gostaba di agredeseba prisensa di pais y ainda agradese Hospital di Tarrafal asim komu presensa di Dr. Augusto.

Leave a Reply

Your email address will not be published. Required fields are marked *

*
*
Website