Orientason Prufisional

Nun épuka undi ki trabadju sta mariadu, tantu pa kenha ki fazi ô pa kenha ki ka fazi kursu, li ô na stranjeru, un grupinhu di jovens, studantis di 11 liseu di Tarrafal ki ta studa na Sentru di Idukason Delta kulltura (SIDK) djuntu na SIDK ku psikóluga Anselmina Tavares mas konxedu pa Any, ki ê tanbé pussora na liseu di vila djunta pa un pikinoti konbersu.

Obujetivu di kel konbersu era orientaba, mostraba, informaba  kes jovens sobri kursus ki sta disponivel na mundu interu inkluindu kabu verdu klaru, pamodi sima nu sabi kada dia sata forma más jovens i nen trabadju ka ten. Pa ki ki nu ten menus jovens na el situason li foi fetu kel debati li undi ki kada un ta ben sabi kal ké midjor pa él, di akordu ku si xkolha i tanbi di akordu ku rialidadi di kada pais.

Na meiu di kel grupu, alguns dja tinha kuazi serteza di kusé kes kré ser, más inda alguns ka teni inda nen ideia di kuzé ké kré ser manhan, pa kela Any staba na SIDK djuntu kós pa tenta diskubri kuzé ki kada un kré ser i ki abilidadi ki kada un sata dixenvolvi manenti.

Duranti kel enkontru di 1h30 tcheus kuzas foi diskutidu, tcheus informasons foi pasadu, mas tanbé tcheu purguntas foi analizadu. Purguntas sima, Mi ê kenha?, Kuzé kin sabi fazi?, Undi nta fazi formason?, Ki formason nta fazi?, surgi sen prublema, más pa rispondi a kes purguntas li foi aprizentadu un série di kursus ki nu podi fazi tantu li na kabu verdi komu la fóra i tanbé kês lugar undi nu podi fazi.

Kun partisipason ativu di kes jovens, ku purguntas ta bai ta ben, ku dimostrasons di impáktu di alguns kursus/prufisons kou ka fika paradu, i na fin tudu alguén staba kontenti ku kes informasons/xklaresimentu ki ta ben djudas inda más, na pensa na kuzé ki kada un kré, ku más kalma i paxenxa.

Nafin di kel dibati, um dizafiu xtremamenti inportanti foi lansadu a kes jovens, ka nu dexa ki alguén disidi pa nós, mas sin, nu disidi pa nós kabesa.

Leave a Reply

Your email address will not be published. Required fields are marked *

*
*
Website